經過上次的文章之後，大家應該對用硬盤挖礦的Burstcoin都有左唔少的認識。咁今次我就講下，同樣係用硬盤去挖礦的另一隻幣 Storj。
Storj 挖礦原理簡介
礦工貢獻閒置的硬盤空間，主要係用來儲存用戶的實用檔案，類似 google，Dropbox，Amazon 提供的雲端存儲服務 Cloud
Storage Services，不過 Storj 佢係去中心化 ( Decentralization ) ，即係D檔案儲存係唔同的礦工電腦上面。
原理大概係咁既，用戶A將”侏羅紀公園”呢套電影，上載到Storj的網絡，網絡就會將呢套電影的檔案分成若干份 ( Shard ) 然後加密，再分散比唔同的礦工去儲存 ( 提供儲存資源的礦工係Storj既世界叫 Farmer )。
之後啦，Storj隨機咁搵出邊個礦工的硬盤係有多餘的容量，咁就分派呢小部分的電影檔案落佢個硬盤度。
同時為左唔想呢D分割左的檔案流失，呢D小檔案，都會複製多幾個，比唔同礦工儲存，咁就避免左因為其中一個礦工丟失左一部份的檔案，而導致用戶A儲存的”侏羅紀公園”電影，因為無左一部分而睇唔到。
咁講解左礦工係 Storj的網絡角色之後，宜家就講下大家最關心的收益部分。
Storj挖礦收益計算
如果你的硬盤好幸運咁比網絡揀中左，恭喜你！因為呢個係令你可以成功得到收益的第一步！係Storj的挖礦入面，礦工的收益主與當月的儲存量，及下載量有關，而後者的因素，影響收益表現的比例係最重，所以我會主力簡介呢一部份，比大家認識。
簡單黎講，儲存係礦工硬盤上的檔案，被下載的流量愈多，收益自然會愈多。舉個例子：
1. 礦工A貢獻40 TB的容量，用戶A係呢個月的下載量是40 TB； 2. 礦工B貢獻45 TB的容量，用戶B係呢個月的下載量是1 TB。
咁呢個月邊個既收益會多D？答案：礦工A，因為收益主要係根據下載量的多少而定，所以礦工A會得到更多收益。
從上述的例子睇到，對於礦工而言，收益係預測唔到既，原因係用戶雖然今日會從Storj下載一個文件，但係唔代表聽日佢都會再下載。正正因為呢個未知素，所以無人可以預測到用戶的下載量實際係幾多。因此你可能會聽過有D礦工提到挖Storj的收益係好唔穩定。
Storj 與Burstcoin 的比較
根據官方的計劃，Burstcoin的發展係分左三個階段，分別係 POC 1，POC 2及POC 3，咁宜家Burstcoin就係 POC 2既階段。係呢個階段，礦工貢獻閒置的硬盤空間，並沒太大作用，純粹係以檔案既方式儲存大量的「哈希函數」。
呢D檔案入面的「哈希函數」，唯一的用途就只係用黎回應網絡的提問 ( 詳細可以睇返硬盤挖礦 ( 四 ) 關於 Plot盤的文章 )，所以並唔似Storj咁，儲存係硬盤的「哈希函數」主要係用黎搶區塊，維繫Burstcoin既網絡。 不過，官方團隊為左係將來令Burstcoin有更多落地的應用，佢地其實一早就係白皮書度，計劃好係POC 3 的階段，利用礦工儲存空間，實現一個分布式的檔案儲存系統，提升Burstcoin的價值。
比起Storj，Burstcoin的挖礦係比較有數得計，因為佢係行POC ( 容量證明 )，即係挖礦的收益，係直接因應你貢獻左幾多閒置的硬盤空間，然後分配番挖礦的收益。
而Storj的收益係需要睇用戶既實則使用量，所以係呢個預測唔到既情況下，普遍人都會用佢地既礦機去挖Burstcoin，至少大部份影響收益既因素都可以有數得計。
因為咁既原故，Burstcoin挖礦只需要進入礦池，然後礦池會依照你貢獻的硬盤空間大小，同貢獻的時間，分配收益比你，即係只要你上線，無論如何都會用盡晒你所有的硬盤空間去挖礦。係Burstcoin挖礦上，要考慮的就係網絡的難度，唔似得Storj，要等到網絡選中你的硬盤，又要等唔知幾時用戶下載。
Timetocoin致力為中文讀者蒐集最新的加密貨幣及區塊鍊消息。如讀者對網站有任何建議，請電郵我們 – [email protected]。
交流各種加密貨幣話題，接收最新情報，加入Telegram群組: https://t.me/timetocoind
