比特大陸出的礦機愈來愈成熟，今次仲出埋水冷的礦機，但往往水冷的設備都係成本極高，唔太效合成本效益，等我地又睇下呢部加左水冷的Antminer S9 Hydro，係咪真係實用呢？根據網上的資料，我地睇到 Antminer S9 Hydro算力係 18T，電耗大約1,728 W，比較現有的 Antminer S9 礦機，雖然算力由 13 T 升級到 18 T，但同時電耗亦多出300 W 左右，相信主要因為加入左水冷裝置技術，而增加了用電量。
水冷的技術為礦機帶來了什麼的好處？
建設一個礦場時，為了可以令礦機係一個合適溫度的環境運作，是需要投資一定的散熱設備的，一般都會使用抽風系統、風扇，有 D 人更會使用冷氣。而水冷的技術係可以大大加強了礦機本身的散熱能力，咁就有可能令到礦場的散熱設備成本減低。
除此之外，水冷設備仲可以降低礦機運行果時所產生的噪音。有相關的資料提出，在相同的挖礦環境底下，S9 Hydro水冷礦機比傳統風冷礦機，最高可降低約20分貝的噪音。
另外，我相信有唔少礦工都會面對礦機清潔的問題，由於礦機要24小時不停運作，利用抽風設備，不斷令礦場空氣流通，但香港的礦場地點大多位於工廠區大廈，所以好容易就會令到礦機經常積左唔少塵，影響散熱，嚴重仲會引致內部零件短路。如果礦機本身設有水冷系統，咁就唔需要單靠風扇散熱，或者可以改善灰塵的問題，當你擁有一個幾十部礦機的礦場，唔使再需要係短時間內成日番去抹塵，我諗都係一個幾實用既好處。
雖然我地睇到水冷技術係可以為礦工帶黎唔少的好處和方便，但礦工始終都係以收益為目標，究竟水冷技術會唔會帶黎真正的成本效益呢，我自己認為尚有待觀察。
