近日有讀者私訊我地問有關硬盤技術 「RAID」方面的問題，所以今日就想同大家分享一下啦。
對一 D 試過自己建造家庭式雲端，或者有用開 NAS 的人黎講，對「RAID」應該都會有一定的認識，但點解又會關我地礦工事呀？
因為「RAID」的技術可以加快硬盤的讀寫速度，或者幫硬盤備份，所以唔少人都會揣測會加強到硬盤挖礦的能力，同埋穩定性，咁係咪又真係岩我地用呢？咁我地首先了解下咩係「Raid」先。
RAID ( 磁碟列陣 ) 的技術大家都比較常聽到 3 種：RAID 0、RAID 1 和 RAID 5。
咁我地今日講解一下大家成日問既 RAID 0 啦。RAID 0 是大家將電腦入面全部的硬盤組合，模擬成為一個大硬盤。
例如用一部 有好多個硬盤的 36 TB 的礦機為例，當所有既硬盤我地決定用 RAID 0 ，開著部電腦之後，電腦就會睇到顯示出只有一個 36 TB 的硬盤存在，但實際硬件上面，你係總共有12個硬盤。
咁 RAID 0 係點架？ 玩法係咁既，若果我要儲存一個英文單字，例如 「Burst」，佢會分別將「B，u，r，s，t」咁多個字，分開儲存係唔同既硬盤上面，咁做可以加快讀寫「Burst」的速度。可以幻想成十個硬盤同時工作，點都快過得一個硬盤工作。
但大家要考慮用 RAID 0 既時候，同時亦要面臨一個大既隱憂，就係當你其中一個硬盤壞左，所有資料就會全部作廢。因為岩岩講過，「B，u，r，s，t」咁多個字係分開唔到硬盤儲存，如果當負責儲存「u」的硬盤壞左，咁就只會得返「Brst」，整個文件就會唔完整，基本上個文件就會作廢，即係等於無左d資料。
咁睇番我地既硬盤挖礦，係挖 Burst 之前，我地係要 Plot 盤既，有讀者就問我地用 RAID 0 可以幫到手嗎？答案其實係會加快到 Plot 盤 的時間，同方便到大家唔使逐個盤去 Plot。不過，岩岩都有提到一個隱憂，就係硬盤有機會損壞的問題，如果你做左 Raid 0 既礦機 ，突然其中一個壞左，咁成個 Plot File 就會作廢，咁之後你要點？咪就係要用之前你 plot盤 的時間，所有 TB 再重新 Plot 一次囉。加快讀寫速度，但放棄左安全性，簡單概括黎講，就係 RAID 0 的特點。
去到呢度 大家可能又會問，既然讀寫速度快D，唔係會令挖礦既收益好D咩？去到呢度，大家需要幻想一下，一架行到 250 Km/h 的跑車，係 50 Km/h 限速的公路上面行走，結果會係點？架跑車當然係唔可以超速，而佢最多只係可以行到 50 Km/h。同樣係電腦既世界，用 2 隻硬盤去行 RAID 0 ，讀寫已經大約 200 MB/s 至 300 MB/s 以上 ( 理論上愈多隻硬盤一齊做 RAID 0 愈快 )，但講緊，宜家香港家用上網最普遍既 1 GB 上網為例子，傳輸都只係得大概 100 MB/s左右，仲未計實際速度可能會再打折扣，根本就支援唔到硬盤咁快既讀寫。
講左咁多，其實個結論係，用 RAID 0 確實係會令到礦機內既硬盤讀寫會快左，但由於我地宜家因為上網網速既限制，所以 Raid 0 暫時都無咩用武之地。除非你有錢到，會裝幾十條獨立既1GB 以上的上網去 Run 一部礦機啦 ( 雖然現在有一條 10 GB 上網，但並唔普及，亦好少地方比你裝到，而價錢都唔平 )，但投資幾十條 1 GB 上網既成本係幾多，唔洗我講，大家可以自己諗。
況且 Burst / Btchd 既挖礦對網速要求都好低，60 TB 都可能講緊用 5 KB 左右。而未來對網路要求高的 Filecoin，我地既建議，當然係睇下網速實際會加強幾多收益，先再決定用唔用 RAID。
記得要做一個精明既投資者，係適當既時候做適當既決定。
